DemoSATH elkarlaneko proiektu pilotu bat da. Proiektu honetan, Espainiako elektrizitate-sarera konektatutako lehen itsas aerosorgailu flotagarria jarri zuten martxan 2022an Saitec taldeak (30 urte baino gehiagoko esperientzia du diziplina anitzeko ingeniaritzako enpresa gisa), RWE energia-enpresa alemaniarrak (itsas energia eolikoaren bigarren garatzaile nagusia mundu-mailan) eta Kansai Electric Power Co. enpresak (Japoniako konpainia elektriko liderra). Instalazioa, 2 MW-ekoa, Euskadiko kostan dago, Armintzan (Bizkaia), eta Saitecek patentatutako SATH teknologia erabiltzen du.
DemoSATHek 2.000 etxe ingururi emango die elektrizitatea.
Bere helburua da datuak biltzea eta hiru urte eta erdiko epean halako aerosorgailuen eraikuntzari, eragiketei, mantentze-lanei eta halako alderdiei buruzko benetako ezagutza eskuratzea.
DemoSATH proiektua mundu-mailako mugarria da sorgailu eoliko flotatzaileei dagokienez; izan ere, itsas zabalean 1 MW baino gehiagoko turbinak instalatu dituen Europako 5.a da, eta garapen-maila horretara iritsi den hormigoizko 3.a.
Gainera, DemoSATHek baditu elementu berritzaile batzuk. Besteak beste, hauek:
- SATH plataforma flotatzailearen diseinua. Turbina eolikoak ur sakonetan instalatzeko irtenbide berritzailea da.
- DemoSATHen hormigoizko egitura berritzailea da, bai diseinuagatik, bai hornidura-katea errazten duelako eta itsas ingurumenari gutxiago eragiten diolako.
- Puntu bakarreko amarratze-sistema, plataformari aukera ematen diona libreki flotatzeko eta itsasoaren eta haizearen baldintzetara egokitzeko.
- Turbina eolikoa plataforma flotatzailean integratua, zeina funtzionamendu eraginkorra eta fidagarria bermatzeko diseinatua baitago.
